'n Vrou Se Gebed
Heer, vergewe my as ek soms
teen die prikkels skop.
As ek soms soos 'n
verwoede bul teen die tralies beur.
Dat ek soms in magtelose woede
en rebelsheid wil uitroep
WAAROM EK?
Gee dat ek betyds sal onthou dat ek
my God nie mag bevraagteken nie.
Heer, as ek hulle wat my seermaak
en verneder, graag met dieselfde
munt wil terugbetaal...
laat my tog dadelik onthou
dat die wraak u toekom.
En Heer, wanneer haat in my opkom
teenoor diegene wat my verontreg...
laat my onthou dat u gesê het:
julle moet jul vyande liefhê,
seën dié wat julle vervloek,
doen goed aan dié wat julle haat.
Heer, wanneer ek dan deur
bitterheid verswelg word,
laat ek tog onthou,
ek is nooit alleen nie.
U is net sover van my af
as wat my knieë van
die grond af is.
Laat ek dan 'n stil hoekie kry
en by my Heer gaan skuiling soek.
Nadat die trane my oë gewas het,
sal ek kan sien hoeveel ek
nog het om voor dankbaar te wees.
Laat ek dan soos die ou liedjie sê,
'n stukkende leë vat wees,
stukkend as U my wil heelmaak,
heel as U my wil volmaak en gebruik.
En as ek die oes
so wit op die lande sien
en die arbeiders so min,
laat ek dan uitroep:
Hier is ek, stuur my!
Amen.